Hraðakstur í Hallormsstaðaskógi

Hraðakstur á veginum í gegnum Hallormsstaðaskóg er viðvarandi vandamál að sögn umferðarfulltrúa Slysavarnafélagsins Landsbjargar og Umferðarstofu á Austurlandi, Reynis Arnórssonar. Að hans mati einungis tímaspursmál hvenær alvarleg slys verða á þessum slóðum. Reynir segir segir að umferð hafi aukist mikið á þessum slóðum eftir að virkjunarframkvæmdirnar hófust við Kárahnjúka og umferða stórra og þungra vörubíla sé nú umtalsverð um veginn. Að hans mati er það mjög slæmt að þörf sé á að beina svo mikilli umferð vörubíla á þessar slóðir því þarna séu þúsundir sumarleyfisgesta á ferð á hverju sumri og mikið um börn og fullorðna á gangi á og við veginn. Samkvæmt þremur hraðakönnunum sem Reynir hefur gert í júlí eru einungis 45% bílstjóra á réttum hraða, 50 km eða minna. Dæmi eru um að bíll hafi mælst á tæplega 100 km hraða sem er tvöfaldur hámarkshraði. Umferðarfulltrúinn vill að yfirvöld geri meira í því að hægja á hraðanum í Hallormstað og setji upp einhverjar hindranir á þessum slóðum sem miða að því að fá bílstjóra til að hægja á sér. Ef ekkert verði að gert megi búast við alvarlegum slysi á þessum slóðum. Reynir segist hafa átt mjög gott samstarf við Vegagerðina og er því bjartsýnn á að brugðist verði við þessum ábendingum hans.