Tíundi hver fangi er útlendingur

Mikill meirihluti útlendinganna sitja inni vegna fíkniefnabrota. Af þrjátíu sem voru í eða luku afplánun á síðasta ári voru sextán inni vegna fíkniefnabrota sem eru 53 prósent eða meira en helmingur. Næst á eftir fíkniefnabrotunum eru auðgunarbrot. "Árið 2001 byrjum við að taka fjölda af erlendum burðardýrum og fá þau dæmd. Ég myndi skjóta á að um níu af hverjum tíu útlendingum sem fara í fangelsi eru menn sem við höfum tekið ýmist fyrir smygl á fólki, fíkniefnainnflutning eða fólk með fölsuð vegabréf," segir Jóhann R. Benediktsson, sýslumaður á Keflavíkurflugvelli. Hann segir aukningu erlendra fanga sýna tvennt, annars vegar að alþjóðleg brotastarfsemi er farin að teygja anga sína hingað til lands. Hins vegar sé bætt tollgæsla og löggæsla einfaldlega að skila góðum árangri. "Skýringa á þessari fjölgun er fyrst og fremst að leita í stærra útlendingasamfélagi. Tölurnar eru í nokkuð eðlilegu samræmi við þróun útlendingamála á Íslandi almennt," segir Georg Lárusson, forstjóri Útlendingastofnunar. Hann segir nýja kynslóð útlendinga hafa byrjað að koma til landsins skömmu fyrir aldamótin og um árið 2000 og árin þar á eftir hafi orðið sprenging. Þá segir hann fjölgunina einnig skýrast af aukningu eftirlits á Keflavíkurflugvelli.