ÁTVR brýtur áfengislög

Áfengis- og tóbaksverslun ríkisins brýtur gegn áfengislögum með því að auglýsa áfengi. Forstjóri ÁTVR segir stofnunina ekki ganga eins langt og heildsalar en tekur undir með þeim að skýrari reglur vanti um áfengisauglýsingar hér á landi. Í fréttum Stöðvar 2 í gærkvöld gagnrýndi Lýðheilsustofnun vínauglýsingar sem birtust í Morgunblaðinu. Lögin skilgreina auglýsingu sem „...hvers konar tilkynningar þar sem sýndar séu í máli eða myndum áfengistegundir eða atriði tengd áfengisneyslu, svo sem áfengisvöruheiti eða auðkenni...“ Þó má auglýsa vörumerki sé orðið léttöl haft með og í sumum auglýsingum sést orðið jafnvel í aðeins tæplega tvær sekúndur. Hallgrímur Geirsson, framkvæmdastjóri Árvakurs, segir ásókn í að birta auglýsingar í fylgiriti um mat og vín. Hann segir misskilning hafa orðið hjá staðgengli ábyrgðarmannsins, sem sé í sumarfríi, varðandi Baileys-auglýsingu sem er beinskeyttari en áður hefur þekkst. En burtséð frá auglýsingum má spyrja hvort keypt umfjöllun sé ekki jafn ólögleg. Starfsmenn áfengisheildsala sem Stöð 2 ræddi við í dag sögðu það ekkert feimnismál að Mogginn og Fréttablaðið seldu þeim pláss fyrir umfjöllun. Sama máli gegndi um vínkynningu í Íslandi í bítið á Stöð 2. Talsmaður Austurbakka segir: „Við borgum fyrir að okkar vín sé notað, svo er það stöðvarinnar að vinna efnið.“ Einnig vekur athygli að sjálft ríkið auglýsi áfengi. Höskuldur Jónsson, forstjóri ÁTVR, segir að ekki séu auglýstar einstakar tegundir heldur sé vínbúðin kynnt, landsvæðin þaðan sem vínin koma og bent sé á með hvernig mat þau henti. Höskuldur segir því að aðrir gangi mun lengra en ÁTVR en kveðst skilja óskaplega vel að kaupmenn reyni að selja sína vöru. Það sé lögmál kaupmennskunnar en skerpi þurfi á hvað megi og hvað megi ekki.