Nánast engar umbætur í brunavörnum

Ekkert hefur verið gert í brunavörnum á tveimur þriðju hluta gistiheimila sem voru með ófullnægjandi brunavarnir í fyrra. Lagfæringar hafa verið gerðar á fimm gistiheimilum af fimmtán en ekkert þeirra er þó með viðunandi brunavarnir að öllu leyti. Á síðasta ári voru brunavarnir ófullnægjandi á nærri helmingi gistiheimila á landinu. Brunamálastofnun gefur hæst „ágætt“, því næst „sæmilegt“ en standist brunavarnir ekki kröfur byggingareglugerðar fá gistiheimilin einkunina „slæmt og í verstu tilfellum óviðunandi og þá skal gera úrbætur tafarlaust. Staða þeirra fimmtán sumargistihúsa sem voru ekki með fullnægjandi brunavarnir í fyrra er eftirfarandi: 1. Á bændaskólanum á Hvanneyri hefur ekkert breyst en farið verður í framkvæmdir á næsta ári. 2. Hótel Reykholt er í sömu sporum og í fyrra. Nýir eigendur huga þó að lagfæringum og sömu sögu er að segja af veitingasalnum þar (3). 4. Á nýju Hóteli Búðum, sem byggt er á brunarústum, er ástandið orðið sæmilegt sem þýðir að brunvarnir eru í lagi í aðalatriðum. 5. Laugaskóli í Dalabyggð fær sömu einkunn þótt nærri helmingur aðstöðunnar hafi verið bættur. 6. Menntaskólinn á Ísafirði fær enn einkunina slæmt en framkvæmdir hefjast á næsta ári. 7. Skólahúsnæði Ferðaþjónustunnar á Reykjanesi fær slæmt en gistingin fær nú sæmilegt. 8. Heimavistin að Reykjum fær aftur slæmt en framkvæmdum til batnaðar lýkur 1. september. 9. Brunavarnir hafa batnað á Farfuglaheimilinu Sæbergi. 10. Ekkert hefur gerst í Húnavallaskóla. 11. Ekkert hefur gerst á Stöng í Skútustaðahreppi en áætlað er að ljúka bótum árið 2006. 12. Nýir eigendur að Hálendismiðstöðinni að Hrauneyjum undirbúa úrbætur. Að lokum hafa gengið brunavarnaveginn til góðs: 13. Menntaskólinn að Laugarvatni. 14. Íþróttakennaraháskóli Íslands, Laugarvatni  15. Heimavist Menntaskólans að Laugarvatni.