Sjómannafélagið skrifaði undir

Boðuðu verkfalli háseta á skipum Hafrannsóknarstofnunar var aflýst síðdegis þegar samningar tókust milli fjármálaráðuneytisins og Sjómannafélags Reykjavíkur. Vegna hugmynda um skerðingu eða niðurfellingu sjómannaafsláttar geta hásetarnir sagt samningnum upp eftir tvö ár. Jónas Garðarsson, formaður Sjómannafélags Reykjavíkur, segir samninginn gilda til ársins 2008 en deilurnar snérust um væntanlegt afnám sjómannaafsláttar. Að öðru leyti hefði samningurinn verið að mestu klár, seinni hlutann í júlí. Ef ekki hefði verið skrifað undir fyrir klukkan 16 hefðu skip Hafrannsóknarstofnunar, Árni Friðriksson og Bjarni Sæmundsson, siglt í land. Vegna hugmynda um skerðingu eða niðurfellingu sjómannaafsláttar geta hásetarnir sagt samningnum upp eftir tvö ár, eða í mars 2006, og er svokallað opnunarákvæði í honum þar að lútandi . Jónas segist sáttur við samninginn og að nú fari hann í atkvæðagreiðslu sem standi til 13. ágúst. Samið var við fjármálaráðuneytið en hugmyndir um breytingar á sjómannaafslætti koma frá ráðherra þess, Geir H. Haarde. Aðspurður hvað gerist ef Geir gerir breytingar strax á næsta ári segir Jónas sjómennina liggja í því til 2006. Þeir verðir þá að bíða og reyna að fá kjarabætur sem því nemur það ár. Spurður hvort hann sjái fyrir sér að þetta verði línan í þeim samningum sem enn eru lausir segist Jónas ekkert sjá fyrir sér í því. Hægt að horfa á viðtal við Jónas Garðarsson úr fréttum Stöðvar 2 með því að smella á myndhlekkinn hér að neðan. Jafnframt er hægt er að hlusta á viðtal við Jónas úr fjögurfréttum Bylgjunnar með því að smella á hljóðhlekkinn hér að neðan.