Bakslag verði húsið ekki rifið

Árni Jóhannesson, framkvæmdarstjóri byggingarfyrirtækisins sem á Austurbæjarbíó, segir ummæli forseta borgarstjórnar um að litlar líkur séu á að húsið verði rifið verulegt bakslag fyrir uppbyggingu á svæðinu. Árni segir málinu ekki lokið og fundar með borgaryfirvöldum í næstu viku. ÁHÁ-byggingarfyrirtækið keypti Austurbæjarbíó af Árna Samúlessyni fyrir tveimur árum og var ætlunin að rífa húsið og byggja minnst 60-70 íbúðir á lóðinni í fimm til sex hæða húsum. Árni Jóhannesson, framkvæmdastjóri byggingarfyrirtækisins, segir að kaupin á húsinu hafi fyrst og fremst tengst áformum Reykjavíkurborgar um að byggja upp og styrkja miðbæinn. Annars hefði fyrirtækið aldrei keypt bíóið. Skipulags- og byggingarnefnd borgarinnar hefur gefið grænt ljós á að íbúðarhús verði reist á lóðinni, þar sem Austurbæjarbíó hefur staðið frá árinu 1945, og hefur borgarráð tekið undir þá afstöðu. Arkitektar Minjasafns Reykjavíkur og Listasafns Reykjavíkur hafa aftur á móti lagst eindregið gegn niðurrifi hússins sem þeir segja hluta af heildstæðri götumynd Snorrabrautar og áberandi hluta fúnkisskipulags Norðurmýrar.  ÁHÁ-byggingarfyrirtækið hóf viðræður við borgaryfirvöld fyrir tveimur árum um að byggja upp á lóð Austurbæjarbíós. Árni Þór Sigurðsson, forseti borgarstjórnar, sagði við fjölmiðla í morgun að hann teldi nær engar líkur á því að Austurbæjarbíó yrði rifið og samkvæmt skoðanakönnun Gallups vill mikill meirihluti borgarbúa að húsið standi áfram. Framkvæmdastjóri byggingarfyrirtækisins lítur svo á að viðræður séu enn í gangi við borgina um þessi mál en hann segir gríðarlega mikið hafa verið spurt um íbúðir á lóðinni. Hann sagði í samtali við fréttastofu fyrir hádegi að ummæli forseta borgarstjórnar væru verulegt bakslag í viðræðurnar og hann taldi að þrýstihópar væru að vinna gegn þeirra áformum. Kostnaður vegna undirbúnings hugsanlegra framkvæmda á lóðinni hleypur þegar á tugum milljóna króna og því brýnt að endanleg niðurstaða fáist um málið. Fulltrúar byggingarfyritækisins hafa verið boðaðir á fund með borgaryfirvöldum í næstu viku. Hægt er að horfa á frétt Stöðvar 2 um málið, þar sem jafnframt er viðtal við Steinunni Valdísi Óskarsdóttu, formann skipulagsnefndar Reykjavíkur, með því að smella á hlekkinn hér að neðan.