Skipum Hafró snúið til lands?

Rannsóknaskip Hafrannsóknastofnunar stöðvast í dag ef samninganefndir ríkisins og Sjómannafélags Reykjavíkur ná ekki samkomulagi á fundi sem nú stendur hjá Ríkissáttasemjara. Rannnsóknaskipin Árni Friðriksson og Bjarni Sæmundsson eru bæði á sjó - Bjarni við kolmunnarannsóknir fyrir austan land og Árni við landgrunnsrannsóknir fyrir sunnan land. Bæði skipin áttu að fara í framhaldsleiðangra í ágúst að sögn Jóhanns Sigurjónssonar, forstjóra Hafrannsóknastofnunar. Samið hefur verið við Sjómannafélagið um að skipunum verði beint til lands um kukkan 16 í dag, hafi ekki náðst samkomulag fyrir þann tíma, og segir Jóhann að það muni óhjákvæmilega raksa rannsóknaáætlunum stofnunarinnar í sumar. Eftir því sem fréttastofan kemst næst hafði náðst samkomulag um launaþætti undirmannanna, en um þá snýst deilan, en Sjómannafélagið vill auk þess tryggja að ekki verið hróflað við sjómannaafslættinum sem samningamenn ríkisins vilja hins vegar gera í áföngum.