Ólíklegt að Austurbær verði rifinn

Það eru ekki miklar líkur á því að niðurrif Austurbæjar verði heimilað," sagði Árni Þór Sigurðsson, borgarfulltrúi Reykjavíkurlistans og forseti borgarstjórnar, er Fréttablaðið leitaði eftir viðbrögðum hans vegna niðurstaðna úr skoðanakönnun um hugsanlegt niðurrif Austurbæjar. Þar kom fram að ríflega sjö af hverjum tíu Reykvíkingum vilja að Austurbæjarbíó fái að standa. Gallup framkvæmdi könnunina að beiðni Hollvinasamtaka Austurbæjarbíós. Steinunn Birna Ragnarsdóttir, talsmaður samtakanna, segir niðurstöðurnar afdráttarlausar. "Ég vænti þess og vonast til þess að borgaryfirvöld hlusti á afgerandi rödd borgarbúa sem þau starfa í umboði fyrir og finni húsinu verðugt hlutverk," sagði Steinunn. Á.H.Á. byggingar, núverandi eigandi Austurbæjar, hefur stefnt að því að láta rífa húsið og byggja þess í stað íbúðar- og verslunarhúsnæði. Árni Þór sagði að málið væri í vinnslu hjá skipulags- og byggingarnefnd en það fékk neikvæð viðbrögð í grenndarkynningu. "Það eru skiptar skoðanir um málið í borgarráði og í nefndinni þó svo að það sé ekkert óeðlilegt við að málið sé ekki komið í formlegt kynningarferli," sagði Árni Þór. Hann segir að von sé á því að skipulagsnefnd afgreiði málið frá sér í ágúst. Hann segir að endanleg ákvörðun um hvort rífa eigi húsið eða ekki verði ekki tekin með tilliti til fyrirætlana eigenda hússins. "Eigandinn keypti húsið og tók þar áhættu með það hvort leyfi fengist fyrir niðurrifi eða ekki," segir Árni Þór. Spurður hvort borgin myndi hugsanlega koma að þeim rekstri sem hugsanlega gæti farið fram í húsinu, segir hann það algjörlega útilokað.