Vegagerð á Vestfjörðum á fullu

Unnið er hörðum höndum að því að bæta vegi á Vestfjörðum. Gangi framkvæmdir að óskum verða aðeins 35 kílómetrar án bundins slitlags í Ísafjarðardjúpi á næsta ári. Meðal framkvæmdanna sem nú fara fram er breikkun slitlags í Álftafirði og malbikun vega í Hestfirði og Skötufirði. Í Álftafirði, þar sem verið hefur einbreitt slitlag og burður í vegi var orðinn lélegur, er nú verið að breikka slitlagið og styrkja og lýkur klæðningu á níu kílómetra kafla nú um helgina. Í Hestfirði og Skötufirði, þar sem vegir hafa víða verið leiðinlegir yfirferðar, er búið að leggja bundið slitlag á sex kílómetra kafla og tíu kílómetrar í viðbót verða lagðir í næstu viku. Að sögn Guðmundar R. Kristjánssonar, deildarstjóra nýframkvæmda hjá Vegagerðinni, hafa framkvæmdirnar gengið vel og allt útlit fyrir að ástandið verði orðið gott um verslunarmannahelgina. Hann segir þó enn töluvert óunnið uns bundið slitlag verði komið á alla vegi Ísafjarðardjúps. Þó væri hægt að klára verkið á næstu fjórum árum ef fjárveitingar fengjust til. Aðspurður hvort það verði brátt liðin tíð að púst undan bílum sjáist liggjandi í vegköntum á Vestfjörðum segir Guðmundur það vera nálægt liðna tíð nú þegar. Þó geti alltaf átt sér stað ófyrirsjáanleg óhöpp, t.a.m. grjóthrun á vegi.