Draugabani á Ströndum

Á Ströndum læra menn að kveða niður drauga og ekki er vanþörf á því allt er morandi í draugum, segir Sigurður Atlason draugabani sem fréttastofan hitti í Hólmavík. Hann segist vera búinn að kveða niður þrjátíu drauga í sumar. Galdrafárið á Íslandi á sautjándu öld er sérstætt tímabil. Á annað hundrað galdramála komu upp og meira en tuttugu manns voru brenndir fyrir galdra. Sautján þeirra voru af Vestfjörðum enda fer miklum sögum af galdrakunnáttu Strandamanna. Á galdrasýningunni í Hólmavík er meðal annars fjallað um uppvakninga, dauða menn sem galdramenn vöktu upp og sendu á óvini sína. Á sýningunni sést uppvakningur þar sem hann rífur sig upp úr gröfinni - og auðvitað bráðnauðsynlegt að kveða hann niður. Sigurður draugabani segir drauga vera um allt land og bendir á að íslensk þjóðtrú sé uppfull af draugasögum og -gangi og vissara sé fyrir þá sem nú eru á lífi að taka eitthvað mark á því. Flestir eru þó draugarnir meinlitlir að sögn Sigurðar en til að gestum, sem taka þátt í þessum gjörningi, verði ekki meint af verða þeir að fara eftir fyrirmælum draugabanans í einu og öllu. Þeir þurfa meðal annars að bera á sér sérstakan stein sem Sigurður lætur þá hafa en losa sig við hann áður en þeir fara út fyrir sýslumörkin. Draugabaninn segist hafa fregnað af tveimur tilvikum þar sem menn hafi gleymt að losa sig við steininn í tíma og áttað sig á því þegar dekk á bíl þeirra hafi sprungið.