Mikið álag á starfsfólki

Þeir sem leita til slysadeildarinnar í Fossvogi geta þurft að bíða í allt að fjórar klukkustundir eftir þjónustu læknis. Yfirlæknir deildarinnar segir að mikið álag sé á starfsfólki, það fari örþreytt heim og sé ekki úthvílt þegar það mæti aftur til starfa. Ekki var unnt nema í einstökum tilfellum að ráða sumarafleysingafólk á deildina og því skiptast fastir starfsmenn á að fara í sumarfrí og leysa hvern annan af á meðan. Álagið er því helmingi meira yfir sumartímann. Deildin fer heldur ekki varhluta af sparnaðaraðgerðum frekar en aðrar deildir spítalans. Ólafur R. Ingimarsson yfirlæknir segir að það gefi augaleið að þegar t.d. helmingur lækna deildarinnar séu í fríi þá sé álagið aukið.   Ólafur segir að ástandið sé þó ekki yfir hættumörkum. Ef um stærri slys er að ræða eða skyndilegt álag á deildina, sé hægt að kalla út starfsfólk af öðrum deildum spítalans. Hann segir að starfsfólk verði að forgangsraða verkefnum eftir alvarleika. Þannig geta þeir sem leita til deildarinnar vegna vandamála, sem geti ekki talist bráð eða hættuleg, þurft að bíða í allt að fjórar klukkustundir, og stundum lengur. Ólafur segir þetta hins vegar koma í bylgjum; stundum sé biðstofan hálftóm og stundum full út úr dyrum. Það fari t.d. eftir veðri og þá sé meira að gera á góðviðrisdögum því þá eru börn og fullorðnir á meiri heyfingu.