Hellisheiðin annar vart álaginu

Mikil og þétt umferð hefur verið um Hellisheiðina í sumar og nú er svo komið að vegakerfið annar vart álaginu. Ólafur Helgi Kjartansson, sýslumaður á Selfossi, segir umhugsunarvert hvort leyfa eigi ýmiss konar áheitaferðir um veginn þar sem sýnt sé að umferðarþunginn er mjög mikill flesta daga. Fréttavefur Suðurlands greinir frá þessu. Undanfarin ár hafa ýmiss konar áheitaferðir verið farnar milli Hveragerðis og Reykjavíkur og ýmist hlaupið, gengið, bolti rakinn eða eins og um liðna helgi, farið á hjólastólum. Í slíkum ferðum er yfirleitt fylgdarlið sem oftast er bæði fyrir framan og aftan þá sem áheitið þreyta. Vegurinn er víðast hvar einungis tvíbreiður og lítið svigrúm til að víkja út í kant. Ferðirnar vekja oft forvitni annarra vegfarenda sem ýmist hægja á akstri eða, eins og um liðna helgi, sveigja út á hægri öxlina og reyndar oft til þess að taka fram úr öfugu megin. Engin ákvæði um áheitaferðir er að finna í umferðarlögum og er það á valdi lögreglustjóra að samþykkja slíkar ferðir. „Mín skoðun er sú að ekki eigi að leyfa slíkar ferðir á þjóðvegi 1,“ segir Ólafur Helgi. „Það hefur sýnt sig að þær tefja umferð og þegar umferðarþunginn er mikill og vegakerfið þetta óburðugt er ekkert sem réttlætir að leggja fólk í hættu þó það sé í þágu góðs málefnis.“ Um liðna helgi fóru um 12 þúsund ökutæki um Hellisheiði, frá miðnætti á laugardag til miðnættis á sunnudag, en umferð um heiðina er orðin ansi þung alla daga. „Hellisheiði þolir ekki þetta mikla umferð tjaldvagna, fellihýsa og flutningabifreiða. Það er löngu tímabært að breikka veginn,“ segir sýslumaður. Ólafur Helgi segir það líka valda sér miklum áhyggjum hve margir bílstjórar haldi að þeir séu einir á ferð á vegunum, haldi langri lest fyrir aftan sig og hleypi engum fram úr. „Þá er rétt að ítreka að það er algerlega bannað að taka fram úr hægra megin á þjóðvegum. Vegaxlirnar þar eru til að menn geti vikið þegar þeir eru að hleypa öðrum fram úr eða ef þeir þurfa að stansa, en alls ekki til framúraksturs. Maður sér stundum ökumenn taka fram úr hægra megin; það er algerlega ólöglegt og má stundum sjá að þar eru íbúar höfuðborgarsvæðisins á ferð sem haga sér eins og þeir séu á tvíbreiðri akrein í borginni og taka fram úr hægra megin. Þetta er ekki bara bannað heldur líka stórhættulegt,“ Ólafur Helgi Kjartansson, sýslumaður á Selfossi.