FÍB í mál við tryggingafélögin?

Ekki er útilokað að Félag íslenskra bifreiðaeigenda höfði dómsmál gegn tryggingafélögunum vegna ólögmæts samráðs. Áfrýjunarnefnd Samkeppnismála hafnaði kröfu félagsins um að ómerkja úrskurð Samkeppnisráðs þar sem tryggingafélögin sluppu við sektir. Framkvæmdastjóri FÍB segir vinnubrögð samkeppnisyfirvalda í málinu til háborinnar skammar. Rannsókn á Tryggingafélögunum og samtökum þeirra tók sjö ár. Á þessu sjö ára tímabili hættu tveir lykilstarfsmenn störfum fyrir stofnunina og mörg önnur viðamikil og tímafrek verkefni drógu úr afkastagetu hennar. Úrskurðurinn var kveðinn upp í lok mars á grundvelli sátta við félögin. Tekið var tillit til þess hversu rannsóknin dróst á langinn og felldar niður allar sektir. Félag Íslenskra bifreiðaeigenda taldi þessa niðurstöðu óviðunandi og kærði hana til úrskurðarnefndar samkeppnismála. Málinu var vísað frá í gær á þeirri forsendu að ekki hefði verið sýnt fram á að félagið ætti slíkra hagsmuna að gæta að það réttlæti aðild þeirra að málinu. Runólfur Ólafsson, framkvæmdastjóri FÍB, segir að úrskurður áfrýjunarnefndar valdi miklum vonbrigðum. Hann segir ekki útilokað að félagasamtökin fari í mál við tryggingafélögin en það kosti milljónir, og jafnvel tugir milljóna. Það sé vitanlega stór baggi fyrir lítil félagasamtök en málið verði skoðað því neytendur hafi þurft að borga einhverja milljarða í formi of hárra iðgjalda af vátryggingum.  Runólfur segir málið allt, og þó sérlega vinnubrögð Samkeppnisstofnunar, til háborinnar skammar. Það verði að gera þá kröfu til aðila eins og samkeppnisyfirvalda að unnið sé hratt og örugglega úr málum sem séu að skaða neytendur í landinu. Að sögn Runólfs fór eitt fyrirtæki, sem var í miðdepli þessarra samkeppnismála, á hausinn á rannsóknartímabilinu og því sé það alvarlegt að Samkeppnisstofnun standi sig ekki betur en þetta Runólfur segir furðulegt að fyrrverandi viðskiptaráðherra hafi verið oddviti tryggingafélaganna í viðræðunum við Samkeppnisstofnun. Aðspurður hvort þetta lykti af pólitík spyr Runólfur á móti hvort það segi sig ekki sjálft.