Stútungasaga undir beru lofti

Þessa dagana standa yfir leiksýningar undir berum himni í Heiðmörkinni. Þar er á ferðinni Stútungasaga sem fjallar á drepfyndinn hátt um Sturlungaöldina og er gert stólpagrín að helstu hetjum þess tíma. Leikhópurinn segist hafa gert sérstakan samning við manninn á efri hæðinni um gott veður allan sýningartímann. Leikritið Stútungasaga fjallar um líf Íslendinga á Sturlungaöld, á þeim tíma er Íslendingar ganga Noregskonungi á hönd. Atburðirnir eru sýndir í mjög kómísku ljósi og eru helstu persónur þess tíma dregnar sundur og saman í góðlegu háði. Leikritið var samið af félögum í leikhópnum Hugleik og sýnt fyrir ellefu árum síðan, en gengur nú í endurnýjun lífdaga í meðförum leikhópsins Sýnir sem setur allar sínar sýningar upp undir beru lofti - nú í Furulundi í Heiðmörk. Aðspurð um muninn á því að leika í leikhúsi eða undir beru lofti segir Lilja Nótt Þórarinsdóttir, framkvæmdastjóri sýningarinnar, ekki hægt að bera það saman. Krafturinn verði t.d. einhvern veginn meiri úti við. Hún segir það líka merkilegt að leikhópurinn hafi ekki enn lent í því að sýna í vondu veðri frá því hann var stofnaður og vonar það haldi áfram - og bætir við: „7-9-13.“ Sýningarnar verða aðeins fimm, sú næsta á morgun klukkan 16 - sama hvernig veðrið verður.