Bílastæði fyrir fatlaða víkja

Tryggingastofnun gerir alvarlegar athugasemdir við tillögur að breyttu skipulagi við Hlemmtorg. Samkvæmt tillögunni verða tvö bílastæði fyrir fatlaða tekin undir sérmerkta beygjuakgrein. Beygjuakreinin liggur frá Laugavegi að Snorrabraut. Tólf athugasemdir bárust við tillögu að nýju deiliskipulagi við Hlemmtorg og voru gerðar lítilsháttar breytingar á síðasta fundi skipulags og bygginganefndar. Enn er þó gert ráð fyrir að bílastæði fatlaðra víki. Í bréfi Tryggingastofnunar til borgaryfirvalda er bent á nauðsyn bílastæðanna. Það sé óviðunandi að hreyfihamlaðir hafi ekki greiðan aðgang að stofnuninnni. Tillaga að nýju deiliskipulagi við Hlemmtorg og umhverfi þess kemur til vegna áforma Strætó bs. um að breyta leiðakerfi almenningsvagna. Þær hugmyndir hafa meðal annars í för með sér að Hverfisgötu milli Rauðarárstígs og Snorrabrautar verður lokað fyrir almennri umferð. Tryggingastofnun hefur óskað eftir viðræðum við borgaryfirvöld um málið.