Siglingaverndarlög kosta offjár

Ný lög um siglingavernd, sem tóku gildi 1. júlí sl., kosta þjóðarbúið hundruð milljóna króna. Þar af leggst margra milljóna kostnaður á hverja höfn vegna þáttar hafnarverndar í lögunum. Fréttavefur Suðurlands greinir frá þessu. Í Þorlákshöfn voru ætlaðar 2,5 milljónir króna til hafnarverndarinnar á þessu ári en upphæðin verður nokkru hærri og aðgerðir til að uppfylla kröfur hafnarverndar munu auk þess hækka rekstrarkostnað hafnarinnar. Hafnirnar eiga að innheimta viðbótargjald af þeim skipum sem falla undir lögin. Forsvarsmenn margra hafna eru ekki sáttir við þessi lög og þá fyrirhöfn og kostnað sem lagður er á hafnarsjóðina. Benda þeir á að hér sé um stóraukna löggæslu að ræða, sem eðlilegt sé að greidd sé úr dómsmálaráðuneytinu og framkvæmd af lögreglu og tollayfirvöldum, en ekki af hafnarstarfsmönnum. Lög þessi ná yfir öll farþegaskip og öll flutningaskip sem eru 500 brúttótonn eða stærri og eru sett samkvæmt ákvæðum alþjóðasamþykktar um öryggi mannslífa á hafinu auk alþjóðakóða um skipa- og hafnavernd, eftir að Bandaríkin komu reglunum í gegn þar. Þau eiga að fela í sér forvarnir til að tryggja vernd skipa, áhafna, farþega, farms og hafnaraðstöðu gegn hvers kyns ógn af hryðjuverkum eða öðrum ólögmætum aðgerðum. Öll skip í millilandasiglingum sem falla undir þessar reglur mega einungis koma til hafna sem uppfylla reglurnar. Í Þorlákshöfn er búið að setja upp girðingar sem eru færanlegar að hluta við þá hafnarbakka sem þessi skip geta lagst við. Auk fasts kostnaðar við slíkt kemur aukinn rekstrarkostnaður vegna varðstöðu meðan þessi skip eru í höfn og vegna námskeiða sem starfsmenn hafnarinnar þurfa að sækja. Indriði Kristinsson, hafnarstjóri í Þorlákshöfn, segir ekki vera búið að ákveða hvaða viðbótargjöld verði lögð á útgerðir þeirra skipa sem lögin nái yfir. „Það eru alls konar reglur hérna,“ segir Indriði. „Hér eiga allir að ganga með nafnspjöld og við eigum strangt til tekið að krefja menn sem við gjörþekkjum um skilríki. Þetta getur auðveldlega skapað leiðindi í höfnum sem eru með blandaða starfsemi á sama svæðinu,“ segir Indriði Kristinsson.