100 ára afmæli síldarvinnslu

Þess er nú minnst á Siglufirði að hundrað ár eru liðin frá því að síldarvinnsla hófst þar í bæ. Skemmtun gærkvöldins stóð langt fram á morgun og en bærinn fór aftur að vakna til lífsins þegar nær dró hádegi. Meðal gesta við hátíðahöldin eru forseti Íslands og frú hans, forseti Alþingis, sjávarútvegsráðherra og norski sendiherrann. Fjöldi annarra gesta, innlendra og erlendra, eru jafnframt viðstaddir hátíðahöldin. Síldarveisla hófst á ráðhústorgi Siglufjarðar klukkan hálf tólf þar sem öllum var boðið að smakka síld og síldarvalsinn dansaður við harnmonikkutónlist. Klukkan 12:15 munu forsetahjónin og fjölskylda Páls Samúelssonar opna formlega gönguleið upp kirkjutröppurnar að hinni gömlu og fallegu kirkju Siglufjrðar. Síldarminjasafnið er opið og síðar í dag verða norskir bátar sýndir við höfnina, auk þess sem norsk hljómsveit mun spila fyrir gesti.  Hægt er að hlusta á Óla Tynes fréttamann tala frá Siglufirði í morgun með því að smella á hlekkinn hér að neðan.