Ekið á fjölda kinda árlega

Ekið er á 20-25 kindur á ári í umdæmi lögreglunnar á Ísafirði og eru þá ótaldar þær sem ekki er tilkynnt um til lögreglunnar. Í fæstum tilvikum verða slys á fólki en tjón á bílum hins vegar umtalsvert. Samkvæmt lögreglunni er búfé sérstaklega hætt við flugvöllinn á Arnarnesi í Kirkjubólshlíð í Skutulsfirði, frá Langeyri að Kambsnesi eða í Sjötúnahlíð í Álftafirði, frá Laugum að Vestfjarðagöngum í Súgandafirði, á Hvilftarströnd og í Bjarnadal í Önundarfirði, frá Gemlufalli að Þingeyri í Dýrafirði, og í Skötufirði, frá Ögurnesi að Þernuvík. Lögreglan á Ísafirði hvetur bændur til að gæta að því að skepnurnar séu ekki á eða við vegi og ökumenn til að haga akstri í samræmi við þessa hættu.