Alþjóðlegur laugardagur í miðbænum

Í dag er alþjóðlegur laugardagur í „Magnaðri miðborg“ þar sem alþjóðlegur hluti miðborgarinnar fær að njóta sín. „Mögnuð miðborg“ er yfirskrift skipulagðrar dagskrár í sumar í miðborg Reykjavíkur. Meðal þess sem verður á dagskrá í tilefni dagsins er eftirfarandi: Í Alþjóðahúsinu verða dansmeyjar frá magadansfélaginu Raksshraki og flamengódanskennsla. Í Café Cultura verða tyrkneskir réttir á boðstólum auk þess sem leikin verður tyrknesk tónlist. Í Iðu, verslunarfélaginu í Lækjargötu, verður ýmislegt um að vera. Guðrún Helgadóttir les upp úr barnabókum sínum, Ómar Ragnarsson verður með kynningu á nýju bókinni sinni og Magadansdísirnar dansa magadans. Í sælkeraversluninni Yndisauka verður kynning á sælkeravörum, í Lavazzakaffihúsinu verður kynning á kaffidrykk og á sushi- og smáréttabarnum Soweiso verður suðrænt hlaðborð. Í Gallerý Reykjavík verður ljósmyndasýning og málverkasýning eftir ýmsa listamenn. Í Grófinni bjóða þær í Kirsuberjatrénu, Fríðu frænku og Kogga miðborgargesti sérstaklega velkomna. Í Sirkusportinu á horni Klapparstígs og Laugavegar verður flóamarkaður allan daginn og á Lækjartorgi verður markaður með lífrænar vörur. Með verkefninu skapast gott tækifæri til að kynna það fjölbreytta starf sem fram fer í miðborginni á sviði menningar, lista, verslunar, þjónustu og félagslífs svo fátt eitt sé nefnt. Takmarkið er að fá sem flesta til að leggja sitt af mörkum til að skapa skemmtilega stemmningu í miðborginni. „Mögnuð miðborg“ er haldin að frumkvæði Þróunarfélags miðborgarinnar í samvinnu við fulltrúa verslunar og þjónustu í miðborginni. Samstarfsaðilar verkefnisins eru Landsbankinn, Morgunblaðið, Höfuðborgarstofa og VÍS.