Skaut 3 skotum úr veiðiriffli

Lögreglan á Akureyri handtók laust fyrir klukkan ellefu í gærkvöldi karlmann á þrítugsaldri. Maðurinn hafði veifað kraftmiklum veiðiriffli sem hann hafði tekið ófrjálsri hendi í heimahúsi fyrr um kvöldið og skotið þremur skotum út í loftið. Talið var að maðurinn ætlaði inn í hús við Aðalstræti að gera upp sakir við mann sem honum hafði sinnast við fyrr um daginn. Þess vegna var götunni lokað og fólki beint frá. Eftir að hafa brotist inn í húsið við Aðalstræti gafst maðurinn upp og var færður í fangaklefa. Hann er grunaður um að hafa verið undir áhrifum fíkniefna. Lögreglan fékk aðstoð sérsveitarmanna á Akureyri við handtökuna og beðið var um aðstoð frá sérsveitinni í Reykjavík en beiðnin var afturkölluð þegar maðurinn hafði verið handtekinn.