Vonbrigði með utanvegaakstur

Í sumar hefur orðið nokkuð vart við utanvegaakstur á hálendi landsins og hafa forsvarsmenn í Ferðaklúbbnum 4x4 sent frá tilkynningu af því tilefni þar sem staða mála er hörmuð.  Klúbburinn segist hafa reynt eftir mætti á tuttugu ára starfstíma sínum að vinna gegn utanvegaakstri og náttúruskemmdum af völdum aksturs í óspilltri náttúru landsins. Það séu því veruleg vonbrigði fyrir félaga klúbbsins að heyra að utanvegaakstur sé nú með mesta móti. Ljóst sé að bregðast þarf við þessari þróun og mikilvægt að frjáls félagasamtök taki höndum saman í því skyni að ná til þeirra sem enn hafa ekki öðlast skilning á þeim skaða sem þetta veldur. Samkvæmt náttúruverndarlögum er allur akstur utan vega bannaður, að undanskildum akstri á snævi þakinni og frosinni jörð. Síðastliðinn vetur var óvenju snjóléttur á hálendinu og allar aðstæður því frábrugðnar því sem verið hefur. Í tilkynningu ferðaklúbbsins segir að ferðamenn á jeppum verða að taka tillit til þess og aðlaga ferðavenjur sínar að þessum aðstæðum. Akstri þurfi alltaf að haga þannig að ekki sé hætta á að för myndist í jarðveginn eða skemmdir verði á náttúrunni. Ferðaklúbburinn 4x4 fordæmir allan óleyfilegan utanvegaakstur og skorar á alla þá sem ferðast á vélknúnum farartækjum um náttúru landsins að huga vel að þessum málum og leggja sig fram um að haga akstri þannig að aldrei skapist hætta á náttúruskemmdum.