Skilti veldur milljónatjóni

Skilti á umferðareyju á Krókhálsi hefur valdið milljónatjóni á bílum sem hafa rekist á það. Skiltið er reist við jafnóðum og það er keyrt niður.  Með nýjum vegatengingum í Hálsahverfi er orðin veruleg umferð um Krókhálsinn. Það spilar líka inn í að ÁTVR er þarna með verslun. Það er því oft talsvert kraðak á vegamótum Hálsabrautar og Krókháls. Þeir sem ætla að beygja til vinstri inn Krókhálsinn þurfa bæði að hyggja að umferð sem kemur á eftir, umferð sem kemur á móti og umferðinni frá Draghálsi sem er á hægri hönd. Ótalmargir hafa lent í því að reyna að skjóta sér á milli bíla og fengið þá umrætt skilti skrapandi eftir hliðinni. Það er ekki ódýrt að lenda í slíku. Að sögn Einars Indriðasonar bifreiðasmiðs er t.d. kostnaðurinn við að skipta um eina bílhurð 100 þúsund krónur og þaðan af hærri.