Margar bensínstöðvar - hátt verð

Runólfur Ólafsson, framkvæmdastjóri FÍB, segir offjárfestingar í bensínstöðvum halda uppi háu eldsneytisverði hér á landi. Samkeppni sé eina meðalið sem dugi á þessa óheillaþróun. Runólfur segir að ein bensínstöð á hvern kílómeter í Reykjavík sé klárlega ekki til hagsbóta fyrir neytendur en skili sér í hærra bensínverði. Það liggi ljóst fyrir að einhver verði að borga fyrir þessa fjárfestingu sem hann segir vera dýra, m.a. vegna mikilla krafna um varnir í tengslum við umhverfisslys. Aðspurður um ástæðu þess að svona margar bensínstöðvar séu í borginni segir Runólfur það líklega þá viðleitni í fákeppnisumhverfi að komast sem víðast og aðhald frá markaðnum vanti í því sambandi. Hann á hins vegar von á að með tilkomu fjórða olíufyrirtækisins, Atlantsolíu, muni verða breyting á þessu.  Runólfur segir ennfremur að borgaryfirvöld séu skyldug til að láta ný olíufélög ganga fyrir um lóðir fyrir bensínstöðvar. Þau verði svo að tryggja jafnræði á milli þeirra fyrirtækja sem eru á markaði til að viðhalda öflugri samkeppni.