Hvalveiðum sjálfhætt

Hvalveiðum er sjálfhætt þar sem nánast enginn markaður er fyrir afurðirnar lengur, segir Árni Finnsson, formaður Náttúruverndarsamtaka Íslands. Tillögur um að hefja hvalveiðar í atvinnuskyni náðu ekki fram að ganga á fundi Alþjóðahvalveiðiráðsins. Hvalveiðiþjóðir stefna að því leggja fram áætlun um slíkar veiðar á næsta fundi eftir ár og náðist góð samstaða um það - einnig meðal þjóða sem eru andsnúnar hvalveiðum. Sendifulltrúi Íslands á ráðstefnuninni sagði raunar að ekki hefði ríkt jafn mikil eining um þetta síðan hvalveiðibannið tók gildi fyrir átján árum. Menn telji betra að veiðunum sé þó stjórnað af ráðinu, fyrst þær fari hvort eð er fram. Árni Finnsson, formaður Náttúruverndarstamtaka Íslands, segir þetta alls ekki valda neinum straumhvörfum. Hann segir að hugsanlega sé um einhvern sáttatón að ræða, einhvers konar málamiðlun, en það verði að koma í ljós á næsta ári. Hins vegar er mjög lítill markaður fyrir hvalkjöt að sögn Árna, t.d. seljist lítið af því hér á landi og ekki sé hægt að selja kjötið til Japans, og því sé veiðunum eiginlega sjálfhætt. Japan hefur hingað til verið langstærsti markaðurinn fyrir hrefnukjöt en á það hefur verið bent að þar hefur heil kynslóð ungmenna ekki alist upp við að borða hvalkjöt. Norðmönnum hefur gengið treglega að selja þangað þær hrefnur sem þeir veiða, að hluta til vegna mengunar sem hefur mælst í kjötinu. Því er ljóst að mikið markaðsstarf er fyrir höndum verði frekari veiðar og útflutningur leyfður. Þess má geta að meira en helmingur af því hrefnukjöti sem veiddist í vísisndaveiðunum í fyrra liggur óseldur í frystigeymslum.