Verkfall háseta yfirvofandi

Verkfall hjá hásetum á hafrannsóknarskipum er yfirvofandi á mánudag, náist ekki samningar fyrir þann tíma. Deilt er um yfirvofandi skerðingu sjómannaafsláttar.  Verkfallið kemur til vegna frumvarps Geirs H. Haarde fjármálaráðherra um skerðingu sjómannaafsláttar. Forsvarsmenn hásetanna vilja semja beint við ráðherra um að kjarasamningar þeirra verði lausir nái frumvarpið fram að ganga. Sævar Gunnarsson, formaður Sjómannasambands Íslands, segir óskiljanlegt að málið sé í þessum farvegi. Hann segir fjármálaráðherra hafa gert sér grein fyrir því fyrir síðustu áramót að frumvarp lægi fyrir um að afnema sjómannaafsláttinn. Sævar segist þá hafa sagt honum að ef ráðherrann ætlaði Sjómannasambandinu að semja við LÍÚ fyrir fiskimenn þá væru líka aðrir sem kæmu að þeim málum, þ.á m. sjómenn á hafrannsóknarskipunum. Honum finnst að fjármálaráðherra eigi nú að setjast niður með hásetunum og koma sínum sjónarmiðum á framfæri. Hásetunum hefur verið boðið að bóka sérstaklega að ef um það verði samið í kjarasamningum sjómanna á almennum markaði, að samningar verði uppsegjanlegir ef sjómannaafslátturinn verði afnuminn, skuli það sama ganga yfir háseta á hafrannsóknarskipum. Þessu hafa þeir hafnað. Samningafundur í deilunni verður á mánudag klukkan hálf ellefu. Verkfallið hefst klukkan hálf fjögur sama dag ef ekki semst. Sævar segir að skipin séu í rannsóknarferðum og verkfallið trufli eða setji áætlanir úr skorðum. Hann vonar að fjármálaráðherra hafi burði til að klára málið áður en til verkfallsins kemur.