Slá skjaldborg um Fischer

Guðfríður Lilja Grétarsdóttir, forseti Skáksambands Íslands, og Hrafn Jökulsson, varaforseti, fóru í gær á fund í bandaríska sendiráðinu til að ræða mál Bobby Fischers sem var fyrir skemmstu handtekinn í Japan. Búist er við að hann verði framseldur til Bandaríkjanna. Guðfríður Lilja segir að forsvarsmenn skákhreyfingarinnar á Íslandi hafi heimsótt bandaríska sendiráðið til þess að koma á framfæri áskorun til Bandaríkjaforseta um að náða Fischer. Hann er sakaður um að hafa rofið viðskiptabann við Serbíu þegar hann atti kappi við Boris Spaskí árið 1992 og á yfir höfði sér allt að tíu ára fangelsisvist. Fischer hefur á síðustu árum látið miklar yfirlýsingar frá sér fara um bandarísk stjórnvöld og utanríkisstefnu þeirra. Guðfríður Lilja segir að margt af því sem hann hafi látið frá sér fara sé óverjandi og ýmislegt bendi til þess að hann þurfi á aðstoð að halda og því sé ótækt að hann verði dæmdur í fangelsi. "Hann var á sínum tíma þjóðhetja í Bandaríkjunum og í öllum hinum vestræna heima þegar hann lagði veldi sovétkommúnismans að velli með sigri á Boris Spasskí í Reykjavík árið 1972," segir hún.