Þunguð kona dæmd í 5 ára fangelsi

Barnshafandi vændiskona frá Síerra Leóne var dæmd í fimm ára fangelsi í Héraðsdómi Reykjaness í dag. Konan, sem hélt fram sakleysi sínu fyrir dómi, var tekin í Leifsstöð með um 5 þúsund e-töflur í bakpoka. Sakborningurinn, hin 25 ára gamla Fanta Sillah, var ekki viðstödd dómsuppkvaðningu í dag. Hún var flutt á spítala í nótt vegna veikinda sem tengjast meðgöngunni og verður að öllum líkindum haldið þar fram að fæðingu, sem er áætluð í október. Efnin fundust í farangri hennar við komu til Keflavíkur 10. júní. Hún flaug hingað frá Frakklandi en hefur flóttamannavegabréf, útgefið í Hollandi, sem rennur út á næsta ári. Sillah segist ekki hafa vitað af efnunum sem hafði verið komið fyrir í fóðrinu í pakpokanum; hún hafi fengið hann að láni hjá vinkonu sinni með þeim fyrirmælum að koma honum í hendur aðila hér á landi. Þær útskýringar voru ekki teknar trúanlegar og taldi dómurinn það hafið yfir allan skynsamlegan vafa að hún vissi af efnunum í pokanum. Hún hafi verið notuð sem burðardýr en ekki sé unnt að líta framhjá eðli og alvarleika brots hennar. Verjandi Sillah krafðist sýknu enda hafi konan búið við hörmungar frá barnæsku og leiðst ung út í vændi. Hún segist hafa stundað vændi víða um Evrópu á undanförnum árum og að ferðin til Íslands hafi verið farin í þeim tilgangi að selja sig íslenskum manni sem hún kynntist nýverið í París. Hún segir að sama kona og hafi lánað sér bakpokann hafi haft milligöngu þeirra viðskipta. Sillah á ungt barn sem er í umsjá ættingja sinna í Sierra Leona og fimm ára barn sem í kjölfar þessa máls var komið fyrir í umsjá hollenskra barnaverndaryfirvalda. Eins og fyrr segir á hún nú von á því þriðja. Verjandi Sillah, Guðmundur B. Ólafsson, telur dóminn strangan en að ekki hafi verið tekin ákvörðun um hvort honum verði áfrýjað. Hann segir líklegt að hún afpláni refsingu sína í Kvennafangelsinu í Kópavogi en dæmi eru um að börn hafi dvalið þar hjá móður sinni, þótt ekki hafi verið um fimm ára tímabil að ræða. Guðmundur segir að til greina komi að farið verði fram á að Sillah taki refsingu sína út í Hollandi af mannúðarástæðum vegna hins fimm ára gamla barns sem hún á þar. Hennar staða sé hins vegar óljós því hún sé frá Síerra Leóne þrátt fyrir að vefabréf hennar sé gefið út í Hollandi. Myndin er tekin þegar Fanta Sillah var dæmd í gæsluvarðhald í síðasta mánuði.