Fundu gamlan alzheimersjúkling

Svæðisstjórn Landsbjargar kom saman sl. fimmtudagskvöld eftir að lögreglan í Reykjavík hafði beðið um aðstoð við leit að áttræðum alzheimersjúklingi. Maðurinn hafði ekki skilað sér heim úr gönguferð frá heimili sínu í nágrenni Laugardals, seinnipart dagsins. Á vef Landsbjargar kemur fram að fljótlega eftir að svæðisstjórn kom saman og var byrjuð að skipuleggja leit og kalla út björgunarsveitir hafi borist símtal frá svæðisstjórnarmanni sem var á leið í útkallið. " Hann var staddur í Ártúnsbrekkunni og hafði keyrt fram hjá eldri manni sem var einn á ferð. Eftir að hann fékk lýsingu á manninum kom í ljós að þar var um að ræða manninn sem saknað var. Svæðisstjórnarmaðurinn bauð hinum "týnda" far sem hann þáði með þökkum enda var hann orðinn þreyttur á göngunni og hvíldinni feginn. Saman fóru þeir til lögreglunnar sem kom honum til síns heima," segir á vef Landsbjargar.