Samtök ferðaþjónustunnar óánægð

Samtök ferðaþjónustunnar hafa óskað eftir því við Brunamálastofnun að kannað verði hvernig standi á því að gististaðir með slæmar brunavarnir séu með starfsleyfi. Kom þetta fram á fundi samtakanna með brunamálastjóra í dag. Fundurinn var haldinn vegna upplýsinga í nýrri ársskýrslu Brunamálastofnunar þar sem fram kemur að enn eru gististaðir, í flestum tilvikum veiðihús, að fá einkunnina „óviðunandi“ og alltof margir gististaðir eru að fá einkunnina „slæmt“. Samtök ferðaþjónustunnar segjast margoft hafa bent sýslumönnum á gististaði sem eru í fullum rekstri án leyfa.