Flugfélag Íslands hækkar fargjöld

Flugfélag Íslands mun hækka almenn fargjöld í innanlandsflugi um 3% að meðaltali frá og með 2. ágúst nk. Þetta kemur fram í tilkynningu sem fyrirtækið sendi frá sér rétt áðan og er ástæða hækkunarinnar sögð vera miklar hækkanir á eldsneytisverði. Vonast hafði verið til að hækkanir eldsneytisverðs væru aðeins tímabundnar en ekkert bendi til að svo sé. Félagið verður því að gera ráð fyrir að þessi kostnaðarliður verði áfram hærri en gert hafði verið ráð fyrir og bregst þ.a.l. við með þessum hætti. Fargjöld Flugfélags Íslands munu hækka um 200 krónur að meðaltali á alla fargjaldaflokka félagsins. Hækkun hæstu flokka getur verið hærri, en lægri á lægri fargjaldaflokka félagsins að því er segir í tilkynningunni. Félagið mun sem fyrr bjóða sérstök netfargjöld sem ekki tengjast beint almennri verðskrá félagsins. Þessi fargjöld eru einungis bókanleg á netinu á flugfelag.is.