Engin vatnaskil í hvalveiðimálum

Árni Finnsson, formaður Náttúruverndarsamtaka Íslands, telur að niðurstöður á fundi Alþjóðahvalveiðiráðsins boði engin sérstök vatnaskil í baráttunni við að fá hvalveiðar í atvinnuskyni leyfðar. Stefán Ásmundsson, sendifulltrúi Íslands á fundi Alþjóðahvalveiðiráðsins, sagðist ánægður með niðurstöðuna í viðtali í fréttum Stöðvar 2 og Bylgjunnar í gær. Tillögur um að hefja hvalveiðar í atvinnuskyni náðu ekki fram að ganga en Stefán sagði að ekki hefði ríkt jafn mikil eining innan ráðsins frá því hvalveiðibannið tók gildi. Aukinn fjöldi ríkja er nú reiðubúinn til að taka þátt í undirbúningsvinnu í tengslum við tillögur um veiðar í atvinnuskyni sem eiga að vera tilbúnar fyrir næsta ársfund. Árni Mathiesen sjávarútvegsráðherra sagði í viðtali við Morgunblaðið í gær að í niðurstöðunni felist ákveðnir möguleikar til þess að hefja hvalveiðar í ábataskyni á ný en að þetta hafi ekki verið nein niðurstaða í þeim efnum. Árni Finnsson, formaður Náttúruverndarsamtaka Íslands, er sammála ráðherra og dregur verulega úr niðurstöðu fundarins. Hann segir að hugsanlega sé um einhvern sáttatón að ræða, einhvers konar málamiðlun, en það verði að koma í ljós á næsta ári. Hins vegar er mjög lítill markaður fyrir hvalkjöt að sögn Árna, t.d. seljist lítið af því hér á landi og ekki sé hægt að selja kjötið til Japans, og því sé veiðunum eiginlega sjálfhætt. Aðspurður hvers vegna menn séu þá að leggja áherslu á að hvalveiðar í atvinnuskyni verði leyfðar á ný segist Árni ekki vita svarið við því.  Hægt er að hlusta á viðtal við Árna Finnsson úr hádegisfréttum Bylgjunnar með því að smella á hlekkinn hér að neðan.