Fullt samráð við BHM

Menntamálaráðherra segir að fullt samráð verði haft við Bandalag háskólamanna og aðra hagsmunaaðila við endurskoðun laga um Lánasjóð íslenskra námsmanna. Þeir fái þó ekki fulltrúa í nefndinni sem endurskoðar málefni Lánasjóðsins. Í hádegisfréttum Bylgjunnar í gær lýsti Gísli Tryggvason, framkvæmdastjóri Bandalags háskólamanna, því yfir að hann teldi Þorgerði Katrínu Gunnarsdóttur menntamálaráðherra vera að sniðganga kosningaloforð með því að skipa ekki fulltrúa hagsmunaaðila í nefnd um endurskoðun laga um Lánasjóð íslenskra námsmanna. Menntamálaráðherra segir hins vegar engin kosningaloforð brotin, enda verði haft fullt samráð við hagsmunaaðila þegar þar að kemur, jafnvel þótt ekki komist þeir allir fyrir í nefndinni. Þorgerður Katrín segir um heildarenduskoðun, á öllum lögum sem varða LÍN, að ræða - ekki aðeins þau sem snerta endurgeiðslubyrðina. Henni finnst að menn verði að anda rólegar og telur ummæli Gísla ótímabær og svolítinn útúrsnúning. Þorgerður segir að nefndin muni kalla á þá hagsmunaaðila sem málið varðar og formaður BHM þurfi ekki að hafa neinar áhyggjur.   Hægt er að hlusta á viðtal við Þorgerði Katrínu úr hádegisfréttum Bylgjunnar með því að smella á hlekkinn hér að neðan.