Missti meðvitund vegna gaseitrunar

Tólf ára gamall drengur kom fjögurra ára systur sinni til bjargar þegar hún missti meðvitund vegna metangaseitrunar við bæinn Oddgeirshóla í Hraungerðishreppi um hádegið í gær. Pilturinn færði systur sína undir bert loft en hún missti meðvitund er hún var að leik með kettlingi í fjósinu þar sem eitrunin kom upp. Stúlkan var flutt á sjúkrahús og dvaldi hún þar í nótt. Henni heilsast nú vel að sögn lögreglu á Selfossi. Kettlingurinn hefur náð sér að fullu en tveir nautgripir drápust af völdum eitrunarinnar.