Lögmaður Moggans hafnar ásökunum

Lögmaður Morgunblaðsins hafnar því að fyrirtækið misnoti markaðsráðandi stöðu sína með því að bjóða fasteignasölum ókeypis auglýsingar á Netinu, gegn því að þeir kaupi auglýsingar í blaðinu. Samkeppnisstofnun hefur málið til meðferðar eftir kvörtun frá öðrum fasteignavef. Tveir stærstu fasteignavefir landsins eru Habil.is og fasteignavefur Morgunblaðsins. Í fréttum Stöðvar 2 á dögunum kvartaði Guðmundur Johnsen hjá Habil yfir því að geta ekki rukkað fasteignasala fyrir skráningu á sinn vef þar sem Mogginn gerði það ekki. Í þessu sambandi gerir Habil athugasemdir við þær reglur Morgunblaðsins að fasteignasali fær ókeypis skráningu inn á fasteignavefnum, auglýsi hann að lágmarki hálfsíðu í blaðinu í mánuði. Slíkt kostar á bilinu 30-50 þúsund krónur. Habil hefur kvartað til Samkeppnisstofnunar og vill að Mogganum verði gert að aðskilja rekstur dagblaðsins og Netsins í þessu tilliti. Þórunn Guðmundsdóttir, lögmaður Morgunblaðins, segir Mbl.is, þar sem fasteignavefur blaðsins er, vera óaðskiljanlegan hluta Morgunblaðsins og hún segist ekki sjá hvernig hægt sé að greina á milli reksturr netmiðilsins og dagblaðsins. Þórunn hafnar því að Mogginn misnoti markaðsráðandi stöðu sína þegar kemur að fasteignaauglýsingum. Hún segir samkeppnina á þeim markaði vera gríðarlega harða og bendir í því sambandi á auglýsingarnar í Fréttablaðinu og Morgunblaðinu, sem og heimasíður allra fasteignasala landsins.