Hálf milljón í styrk

Íþróttabandalag Reykjavíkur fær hálfa milljón í styrk frá Reykjavíkurborg vegna Reykjavíkurmaraþonsins sem haldið verður þann 21. ágúst. Þetta var ákveðið á fundi borgarráðs á þriðjudag. Kristín Árnadóttir, framkvæmdastjóri fjölskyldu- og þróunarsviðs Reykjavíkurborgar, segir umsvif Reykjavíkurmaraþonsins hafa aukist með árunum. "Undanfarin ár hefur Reykjavíkurmaraþon og Menningarnótt verið haldin saman og það verður að líta á þessa viðburði sem eina heild," segir Kristín. Kristín segir að henni ásamt framkvæmdastjóra Íþrótta- og tómstundaráðs og forstöðumanni Höfuðborgarstofu hafi verið falið að meta hvort ástæða sé til að gera samning til lengri tíma en eins árs og skoða hvort hægt sé að stilla betur saman strengi atburðanna.