Ný skip á dagskrá

Björn Bjarnason dómsmálaráðherra segir að það sé vissulega á dagskrá að útvega Landhelgisgæslunni ný skip til eftirlits á sjó. Það sé eitt af stefnumálum ríkisstjórnarinnar.  Eins og stendur er landhelgin óvarin þar sem bæði skipin sem Landhelgisgæslan heldur úti eru í höfn. Skipakostur Gæslunnar er kominn til ára sinna en honum er hins vegar mjög vel við haldið og búið að bæta í hann margvíslegum nýjum búnaði. Alls ekki er óalgengt að gæsluskip í eigu þjóða séu þrjátíu ára gömul. Fyrir átta árum var þó tekin um það ákvörðun að útvega gæslunni nýtt skip. Kröfu og þarfalýsing var gerð af öflugu 3000 tonna gæsluskipi sem er ekki ólíkt Þetis-freigátum danska flotans. Þetis var móðir Akkilesar í grískri goðafræði og sá gat aldeilis bitið frá sér. Björn Bjarnason dómsmálaráðherra sagði í samtali við fréttastofuna að það væri enn á stefnuskrá ríkisstjórnarinnar að útvega Landhelgisgæslunni nýtt skip, þótt ekkert hafi gerst í því máli upp á síðkastið. Björn sagði ástæðu til þess að meta þörfina að nýju að átta árum liðnum og einnig aðra möguleika en nýsmíði. Þannig sé ekki óalgengt að skip séu tekin á leigu til gæslustarfa, ekki síður en til annarra verkefna á sjó. Ýmsir möguleikar séu því fyrir hendi.