Líðan Davíðs góð

Líðan Davíðs Oddssonar forsætisráðherra, eftir aðgerð sem hann gekkst undir í gær, er sögð góð. Hann hefur verið fluttur á legudeild Landspítalans. Davíð Oddsson var fluttur á bráðadeild Landspítalans í fyrrinótt vegna gallblöðrubólgu og við rannsókn kom í ljós staðbundið æxli í hægra nýra. Forsætisráðherra gekkst undir aðgerð þar sem gallblaðran var fjarlægð og einnig nýrað. Samkvæmt upplýsingum frá forsætisráðuneytinu gekk aðgerðin að óskum. Hann hefur verið fluttur á legudeild og líðan hans er sögð góð. Framfarir eru eðlilegar eftir aðgerð sem þessa að sögn lækna. Rétt er taka fram að batahorfur eftir slíkar aðgerðir eru góðar. Að sögn Ársæls Kristjánssonar þvagfæraskurðlæknis er algengt að fyrirferð eða æxli greinist í nýrum, eða á milli 40 og 50 tilvik á ári. Stór hluti þessa fólks gengst undir aðgerð. Ef æxlið reynist staðbundið og er numið í burtu eru miklar líkur á að fólk nái sér að fullu. Nýrun eru afar öflug og fullorðinni manneskju nægir að hafa rúmlega þriðjung af öðru þeirra til að það gegni sínu hlutverki. Gallblöðrubólga er einnig algeng en þá er gallblaðran fjarlægð eins fljótt og auðið er. Á þriðja hundrað slíkar aðgerðir eru framkvæmdar á ári hverju. Fólki reiðir yfirleitt ágætlega af og einungis lítill hluti þarf á lyfjagjöf að halda. Ólafur Davíðsson, ráðuneytisstjóri í forsætisráðuneytinu, segir ekki hægt að segja til um hve lengi lengi Davíð verður fjarverandi. Eðlilegt sé að nokkurn tíma taki að ná fullri heilsu. Halldór Ásgrímsson er nú starfandi forsætisráðherra.