Guðrún lekur enn olíu

Yfirvöld og umhverfissamtök í Noregi krefjast svara við því hvers vegna enn sé vart við olíuleka úr togaranum Guðrúnu Gísladóttur sem sökk við strönd Noregs í júní 2002. Ekki eru liðnar nema tvær vikur síðan tilkynnt var að kafarar hefðu losað allar olíubirgðir skipsins en komið hefur í ljós að enn verður vart olíu. Losuðu kafararnir um 80 tonn úr flakinu en alls voru 400 tonn í skipinu þegar það sökk. Hafa sveitarstjórar nærliggjandi hreppa gagnrýnt landhelgisgæsluna fyrir aðgerðaleysi en ákveðið var á norska stórþinginu í vor að láta skipið liggja í sumar áður en um frekari aðgerðir verður að ræða.