Hraðatakmörkunum breytt á Bíldudal

Byggingarnefnd Vesturbyggðar leggur til að takmörkun á hámarkshraða við Bíldudal verði færð og hámarkshraðamerkingar málaðar á yfirborð vegar. Í síðustu viku beið fjórtán ára stúlka bana þegar ekið var á hana á þjóðveginum skammt fyrir utan bæinn. Nefndin leggur til að kaflinn þar sem leyfilegur hámarkshraði er 90 kílómetrar á klukkustund verði styttur til að minnka slysahættu. Neðan við þjóðveginn er meðal annars íþróttavöllur sem mikil umferð er um. Geir Gestsson, formaður bygginganefndarinnar, segir að breytingarnar séu ekki lagðar til vegna slyssins í síðustu viku heldur hafi þær verið til umræðu um hríð ásamt öðrum breytingartillögum.