Fischer verði gefnar upp sakir

Skáksamband Íslands beinir þeim eindregnu tilmælum til forseta Bandaríkjanna að fyrrverandi heimsmeistara í skák, Bobby Fischer, verði gefnar upp sakir og ákærur á hendur honum, fyrir að hafa brotið viðskiptabann Bandaríkjanna gegn Júgóslavíu árið 1992, verði felldar niður. Brotið felst í því að Fischer háði skákeinvígi við Boris Spasský, hinn sama og hann tefldi við í Reykjavík árið 1972, í Júgóslavíu eftir að yfirvöld í Bandaríkjunum höfðu lagt viðskiptabann á landið.   Stjórn Skáksambands Íslands kom saman til fundar í hádeginu í dag til að ræða mál Roberts J. Fischer, eins og skáksnillingurinn heitir nokkurn veginn fulllu nafni. Stjórnin samþykkti áskorun í þessu efni sem færð verður sendiherra Bandaríkjanna á Íslandi. Myndin var tekin af Fischer í einvíginu við Spasský árið 1992.