Upplýsingarnar ekki endanlegar

Ríkisendurskoðandi og fulltrúar fjármálaráðuneytisins voru boðaðir á fund fjárlaganefndar Alþingis í morgun til að fara yfir skýrslu Ríkisendurskoðunar um framkvæmd fjárlaga fyrir árið 2003. Formaður fjárlaganefndar segir upplýsingar í skýrslunni ekki vera endanlegar. Fundur fjárlaganefndar hófst klukkan 8 í morgun og stóð í rúmar tvær klukkustundir. Að sögn Magnúsar Stefánssonar, formanns fjárlaganefndar, var um hefðbundna yfirferð að ræða í tengslum við skýrslu Ríkisendurskoðunar um framkvæmd fjárlaga fyrir árið 2003. Sigurður Þórðarson ríkisendurskoðandi mætti á fundinn ásamt Baldri Guðlaugssyni, ráðuneytisstjóra fjármálaráðuneytisins, og öðrum fulltrúum ráðuneytisins. Skeytin hafa að undanförnu flogið milli fjármálaráðherra og ríkisendurskoðanda. Í skýrslunni er m.a. gagnrýnt að framkvæmd fjárlaga hafi einkennst af agaleysi ár eftir ár og vill ríkisendurskoðandi að gripið verði í taumana. Fjárlaganefnd voru kynntar þær athugasemdir sem fjármálaráðuneytið hefur gert vegna skýrslunnar en ráðherra telur að meðferð talna sé ónákvæm, auk þess sem ýmislegt í framsetningu hennar sé villandi og óheppilegt. Magnús Stefánsson segir Ríkisendurskoðun gjarnan gera úttekt á framkvæmd fjárlaga og þetta sé því hefðbundið. Hann tekur fram að þær tölulegu upplýsingar, sem komi fram í skýrslunni, séu ekki endanlegar því ríkisreikningur fyrir árið 2003 komi ekki út fyrr en í haust. Ekki fyrr en þá liggi fyrir endanlegar niðurstöður fyrir síðasta ár og í kjölfar þess muni fjárlaganefnd fjalla um málið. Ríkisendurskoðun hefur farið yfir athugasemdir fjármálaráðherra við efni skýrslunnar og staðfestir að í þeirri yfirferð hafi komið fram nokkrar villur sem beðist er velvirðingar á. Í því sambandi er bent á að í samantektarkafla segi að í árslok 2003 hafi um 120 af 530 fjárlagaliðum verið með meiri uppsafnaðan halla en 4%, en rétt sé að fjöldinn hafi verið 108. Baldur Guðlaugsson, ráðuneytisstjóri í fjármálaráðuneytinu, segir engan ágreining vera á milli ráðuneytisins og ríkisendurskoðunar um kjarna málsins, sem sé mikilvægi  þess að vel sé staðið að framkvæmd fjárlaga og aðhaldi og aga í ríkissfjármálum. Athugasemdir ráðuneytisins hafi lotið að tilteknum þáttum í skýrslu ríkisendurskoðunar sem þeim þætti fá fullmikið vægi og gæfu villandi mynd af málinu.   Hægt er að hlusta á viðtöl við Magnús Stefánsson og Baldur Guðlaugsson með því að smella á hljóðhlekkinn hér að neðan. Einnig er hægt að horfa á frétt Stöðvar 2 um málið með því að smella á myndhlekkinn hér að neðan.