Tímamótaskref tekið í dag

Búist er við að tímamótaskref verði tekið á fundi Alþjóðahvalveiðiráðsins í dag sem miðar að því að heimila hvalveiðar í atvinnuskyni á ný. Bandaríkjamenn styðja ásamt Íslendingum, Norðmönnum og Japönum tillögu um að endurskoðun á veiðistjórnunaráætlun verði lokið fyrir næsta ársfund ráðsins. Fundi Alþjóðahvalveiðiráðsins lýkur í Sorrento á Ítalíu í dag en hann hefur staðið frá því á mánudag. Engin þáttaskil urðu á fundi ráðsins í gær. Tillögur um að heimila takmarkaðar veiðar í atvinnuskyni biðu þess enn í gærkvöldi að verða ræddar frekar en allt útlit þykir fyrir að Alþjóðahvalveiðiráðið sé reiðubúið til þess að binda enda á 18 ára bann í þeim efnum. Grænfriðungar og aðrir umhverfisverndarsinnar hafa gagnrýnt harkalega öll skref sem miða að því að leyfa veiðar í atvinnuskyni og túlka þau sem verulegt bakslag í baráttu sinni gegn hvalveiðum. Bandaríkjamenn styðja ásamt Íslendingum, Norðmönnum og Japönum tillögu um að endurskoðun á veiðistjórnunaráætlun ljúki fyrir næsta ársfund ráðsins, sem haldinn verður í Suður-Kóreu, en formaður Alþjóðahvalveiðiráðsins hefur hvatt til þess að vinnu við áætlunina verði lokið svo hvalveiðarnar geti hafist. Hvalveiðiþjóðirnar benda á að sumir hvalastofnar hafi náð gríðarlegri stærð og eðlilegt sé að leyfa veiðar undir ströngu eftirliti. Breytingar í þá veru hafa reynst afar erfiðar hingað til þar sem krafa er gerð um að samþykki 75% aðildarríkjanna þurfi til þess að heimila breytingar.