Ákvörðun um hvalveiðar í dag

Í dag verður ákveðið á fundi Alþjóðahvalveiðiráðsins í Sorrento á Ítalíu hvort 18 ára löngu banni á hvalveiðum í atvinnuskyni verði aflétt, samkvæmt tillögu formanns ráðsins, Danans Hendriks Fischers. Enda þótt líklegt sé að meirihluti aðildaríkja ráðsins sé fylgjandi því að aflétta banninu er ólíklegt að tillagan verði samþykkt því þrjú af hverjum fjórum ríkjum í ráðinu þurfa að styðja tillöguna til að hún öðlist gildi. Ísland, Noregur og Japan eru dyggustu stuðningsmenn tillögunnar en nokkur ríki, sem til þessa hafa verið andvíg hvalveiðum, telja tillögu Fischers ákjósanlega málamiðlun og hyggjast styðja hana. Má þar nefna ríki á borð við Írland, Spán, Ítalíu, Holland, Brasilíu og nú síðast Bandaríkin. Helstu andstæðingar þess að leyfa hvaleiðar að nýju eru Bretland, Ástralía og Nýja-Sjáland.