Varnarsvæðið nær út fyrir girðingu

Vopnaðir bandarískir hermenn hafa þrisvar á skömmum tíma haft afskipti af ljósmyndurum Víkurfrétta. Sýslumaðurinn á Keflavíkurflugvelli segir varnarsvæðið ná út fyrir girðinguna sem umlykur herstöðina. Það var síðast í gær sem vopnaðir varnarliðsmenn umkringdu ljósmyndara Víkurfrétta þar sem hann var að mynda í grennd við gamla Patterson völlinn. Ljósmyndarinn, Atli Már Gylfason, segir varnarliðsmennina hafa spurt sig hvað hann væri að gera þarna, tekið niður nafn og kennitölu og óskað eftir því að fá myndavél hans og kortið sem í henni væri. Atli Már segist hins vegar hafa harðneitað því og eftir japl, jaml og fuður fékk hann að fara. Meðan fréttamenn Stöðvar 2 biðu eftir að hitta Atla til viðtals, um hálfan kílómetra frá aðalhliði herstöðvarinnar, kom til þeirra íslenskur lögregluþjónn. Hann var kurteis og meinaði þeim ekki myndatöku en sagði að bandarískir kollegar sínir vildu vita hvað væri á seyði. Að því loknu var leitað til Jóhanns R. Benediktssonar, Sýslumanns á Keflavíkurflugvelli, til að forvitnast um hvaða umgengnisreglur giltu eiginlega þarna syðra.  Jóhann sagði misskilning fólginn í því að fólk héldi að varnarsvæðið markaðist af girðingunni sem umlykur herstöðina. Svo sé hins vegar ekki því það sé talsvert stærra. Ljósmyndarinn hafi því staðið á varnarsvæði. Jóhann segir fréttamenn á Suðurnesjum eiga að vita betur en ef þeir séu óvissir um þetta, þá eigi þeir að hafa samband við Sýslumannsembættið og fá liðsinni.