Landhelgin óvarin

Landhelgin er nú óvarin þar sem bæði varðskipin sem Landhelgisgæslan rekur eru í höfn. Samþykkt var að smíða nýtt varðskip fyrir átta árum en ekkert hefur orðið af því. Á tímum þorskastríðsins fyrir um 30 árum voru allir flokkar sammála um að Landhelgisgæslna skyldi fá allt sem hún þyrfti til þess að sinna skyldustörfum sínum. Núna er landhelgin óvarin. Það hefur mikið vatn runnið til sjávar frá því áhafnir Landhelgisgæslunnar börðust til sigurs í þorskastríðinu á öllum tiltækum fleytum, þ.á.m. skuttogurum sem teknir voru á leigu. Nú á gæslan aðeins þrjú skip. Tvö þeirra, Ægir og Týr, eru um þrjátíu ára gömul og Óðinn er rúmlega fjörutíu ára. Vegna fjárskorts getur Gæslan ekki haldið úti nema tveim skipum. Og nú er það að gerast, í fyrsta skipti í sögu lýðveldisins, að ekkert varðskip verður við gæslustörf á sjó næstu daga. Týr er úr leik fram í ágúst og Ægir á leið til hafnar. Hlutverk Landhelgisgæslunnar er ekki aðeins að hafa með höndum eftirlit og vörslu fiskveiðilögsögunnar. Hún á einnig að að hafa eftirlit með öryggi sjófarenda, mengunareftirlit á hafinu, siglingavernd á rúmsjó og, síðast en ekki síst, björgun mannslífa á sjó. Til þess hefur hún nú þrjú eldgömul skip. Fyrir átta árum var samþykkt að smíða nýtt og öflugt 3000 tonna varðskip. Þarfa- og smíðanefnd þess verkefnis hafa löngu skilað af sér og teikningar eru löngu tilbúnar. Skipið hefur lengi verið tilbúið til útboðs en á því bólar ekki ennþá.