Gæsluvarðhaldið framlengt

Gæsluvarðhald yfir 45 ára gömlum manni, sem grunaður er um aðild að hvarfi fyrrverandi sambýliskonu sinnar í Stórholti, var í dag framlengt í Héraðsdómi Reykjavíkur um þrjár vikur, eða til 11. ágúst. Maðurinn hefur setið í gæsluvarðhaldi síðan 6. júlí, tveimur dögum eftir að Sri Rahmawati, fyrrverandi sambýliskona hans, hvarf sporlaust. DNA-rannsókn á blóði í íbúð og bíl mannsins staðfestir að það hafi verið úr Sri en í íbúðinni voru einnig ummerki um átök sem lögregla telur benda til glæps. Maðurinn tók sér þriggja daga frest til að ákveða hvort gæsluvarðhaldsúrskurðurinn verður kærður til Hæstaréttar en samkvæmt honum skal maðurinn jafnframt sæta geðrannsókn.