Lítil spilling en margt að varast

Lítil spilling er á Íslandi en stjórnvöld þurfa þó að huga betur að öllum reglum til að fyrirbyggja slíkt í framtíðinni. Þetta er frumniðurstaða Greco, samstarfshóps nokkurra Evrópuríkja, sem metur og berst gegn spillingu innan opinberrar stjórnsýslu. Skýrslan í heild sinni hefur ekki verið birt og verður ekki fyrr en íslensk stjórnvöld hafa svarað fyrirspurnum hópsins en lykilniðurstöður eru þær að meðan löggjafinn taki á ólögmætum gróða og opinber stjórnsýsla sé gegnsæ sé ástæða til að skoða nánar reglur þær og lög er í gildi eru. Meðal annars þarf að setja siðareglur í stjórnsýslunni og setja reglur hvað varða skyldur opinberra starfsmanna að tilkynna um ólögmætar eða ótilhlíðilegar ákvarðanir. Í framhaldi af því þurfi að huga að vernd þeirra sem tilkynna um slík athæfi. Þess er vænst að íslensk stjórnvöld framkvæmi þessi tilmæli fyrir lok næsta árs. "Ég hef ekki kynnt mér þessar niðurstöður til hlítar en mér sýnist þeir benda á svipuð atriði og við höfum gert áður," segir Sigurður Þórðarson, ríkisendurskoðandi. "Við gerðum úttektir á flestu því sem Greco skoðaði og ég get tekið undir það litla sem ég hef heyrt varðandi gagnrýni þeirra."