Athugasemdum vísað til föðurhúsa

Ríkisendurskoðun vísar athugasemdum fjármálaráðuneytis vegna umdeildrar skýrslu um framkvæmd fjárlaga árið 2003 að mestu til föðurhúsanna og stendur við flest það sem þar stóð. Þetta kemur fram í bréfi Sigurðar Þórðarsonar, ríkisendurskoðanda, til ráðuneytisins en alls setti ráðuneytið út á níu atriði í upphaflegri skýrslu Ríkisendurskoðunar. Viðurkennir Sigurður að um þrjár villur hafi verið að ræða í skýrslunni en eftir standi engu að síður sú gagnrýni að mikilvægt sé að bæta fjármálastjórn stofnana ríkisins. Nauðsynlegt sé að koma í veg fyrir umframkeyrslu í rekstri allra ríkisfyrirtækja og stofnana til að möguleiki sé á að markmið ríkisstjórnarinnar um hallalausan rekstur náist. Í bréfinu kemur einnig fram sú ósk að öll gagnrýni á Ríkisendurskoðun sé sett fram með sanngjörnum og málefnalegum hætti enda sætti stofnunin sig við réttmæta gagnrýni með sama hætti og stjórnvöld.