Landhelgin óvarin

Útlit er fyrir að ekkert íslenskt varðskip gæti landhelgi Íslands sem og öryggis sjómanna á hafi úti næstu tvo til þrjá dagana en eina varðskipið sem er við skyldustörf á hafi úti er á leið í land í vikufrí. Munu samkvæmt heimildum blaðsins einhverjir dagar líða áður en annað varðskip fer út í staðinn og því verður landhelgi Íslands óvarin með öllu á meðan. Hafsteinn Hafsteinsson, forstjóri Landhelgisgæslunnar, viðurkennir að til þess gæti komið að öll varðskipin séu í höfn í einu í stuttan tíma en vildi að öðru leyti ekki tjá sig um málið. Málefni LHG hafa lengi verið í lausu lofti. Fjárskortur hefur hrjáð um langan tíma og hefur forsvarsmönnum stofnunarinnar ítrekað verið gert að skera niður ár frá ári. Til að halda sig innan fjárlaga er gripið til ráða á borð við það að kaupa olíu og vistir af Færeyingum þegar þess er nokkur kostur enda kostnaður þar talsvert minni en hér. Sá fjöldi daga sem skip Gæslunnar eru á sjó fer árlega fækkandi fyrir utan þá staðreynd að öll skip hennar eru komin vel til ára sinna. Dómsmálaráðherra, Björn Bjarnason, sem fer með málefni LHG, vísaði fyrirspurnum vegna þessa á stjórnendur Landhelgisgæslunnar.