Eldur í Elliðaárdal

Allt tiltækt slökkvilið var kallað út að gömlu rafstöðinni í Elliðaárdal rétt fyrir klukkan tvö í gær. Talsvert mikinn reyk lagði frá húsinu sem hýsir enga starfsemi og notað er sem geymsla. Enginn var inni í húsinu þegar eldurinn kom upp. Upptök eldsins voru í einangrun og þurfti slökkvilið að rífa klæðningu af gafli til þess að komast að eldinum. Tók það nokkurn tíma en eftir það gekk slökkvistarf fljótt og vel fyrir sig. Nokkrar skemmdir urðu á gafli og þaki hússins. Garðyrkjufólk var á staðnum þegar eldurinn kom upp en talið er að kviknað hafi í út frá lömpum sem notaðir eru til þess að brenna illgresi.